– Идната година археолошките истражувања ќе бидат насочени кон локалитетот Била Зора, кој има огромен потенцијал – истакна министерката за култура Елизабета Канческа-Милевска при посетата на oпштина Свети Николе, каде што имаше средба со градоначалникот Зоран Тасев.
Ресорното министерство ќе ги финансира истражувањата и конзервацијата на пронајдените артефакти, но, посочи таа, неопходно е до археолошкото наоѓалиште да се изгради патна инфраструктура. Советот на oпштина Свети Николе донесе одлука за асфалтирање на патот.
– Со целиот тој капацитет да се продолжи со истражувањата на овој значаен локалитет, за кој сум убедена дека ќе има огромен потенцијал за туристичка промоција на Свети Николе, а преку него и на нашата држава – рече Канческа-Милевска.
Градоначалникот на Свети Николе истакна дека за општината е од големо значење локалитетот Била Зора, за кој минатите години беа заинтересирани и археолози од странство.
Исто така, беше нагласено дека Министерството за култура континуирано ќе одвојува средства за поддршка на реализацијата на проекти на Домот на културата од доменот на театарската, ликовната и музичко-сценската уметност, како и за проектот „Топол културен бран“, кој овозможува дисперзија на културните вредности до секој граѓанин во Македонија.